Tiltekt, Kaupmannahöfn og bókalestur

Undanfarna daga hafa farið fram reglulegar tiltektir í hinum ýmsu skúmaskotum í okkar ágætu íbúð. Ekki er vanþörf á. Ekki ber svo að skilja að hér sé allt í drasli, síður en svo, heldur þarf að rýmka í hirslum áður en fjölskyldan stækkar í sumar byrjun. Einn liður í þessari aðgerð var þvottahúsið. Það kom okkur skemmtilega á óvart að það eru flísar á þvottahúsgólfinu.

Við brugðum okkur af landi brott yfir s.l. helgi til höfuðstaðs Danaveldis. Þetta var ágætis afslöppun frá þrifum og almennri geðveiki. Danir eru nefnilega lausir við þessa geðveiki og hraða sem er að buga okkur hér á höfuðborgarsvæðinu. Við borðuðum góðan mat, fórum í búðir og skoðuðum okkur um í Kóngsins Köben. Kallinn fékk sér nokkra Græna á fornum slóðum Þjóðskáldanna á meðan frúin keypti barnaföt og til varð þessi vísa.

Smörrebröd og snus i vör
smuk er Hvides Vinstue.
To tre öl bliver mör
dejligt er Tuborg flue.

Og aftur var kallinn í stuði af sama tilefni.

Angann finn þess andansmanna,
angist þeirra og böl.
Eigi þurftu neitt að sanna,
ég skála í einum öl.

Ég lauk við að lesa frábæra bók um helgina sem kerlingin hún móðir mín lánaði mér. Hún ber nafnið Frásögn um margboðað morð eftir Gabríel Garsía Marquez. Sagan segir frá manni sem tekinn er af lífi af tvíburabræðrum sem eru að gæta heiðurs fjölskyldunar. Þetta er mögnuð bók og kvitta ég fyrir það. Núna er ég að lesa Alekemistinn hún lofar bara góðu. Meira um það síðar.


Annars eru hér allir heilir á húfi þó stutt sé í almenna geðveiki.

Hilsen.